བོད་རང་བཙན་སྐོར་གྱི་འགྲན་རྩོམ་བྱ་དགའ།

རྒྱལ་སྤྱིའི་བོད་རང་བཙན་ཚོགས་ཆེན་ཐེངས་ལྔ་པ་གོ་སྒྲིག་ཚོགས་ཆུང་ནས་ལོ་རྒྱུས་ཐོག་ནས་བོད་རང་བཙན་སྐོར་དང་། བོད་རང་བཙན་འཐབ་རྩོད་བྱེད་ཕྱོགས་སྐོར་ལ་རྩོམ་ཡིག་འགྲན་སྡུར་ཞིག་གོ་སྒྲིག་བྱས་པའི་ནང་ནས། ཤོང་ཤར་རྒྱལ་སྲས་ཀྱིས་བྲིས་པའི་ “ལོ་རྒྱུས་ཀྱི་ཁྲོད་ནས་བོད་དེ་རང་བཙན་རྒྱལ་ཁབ་ཅིག་ཡིན་པ་༸རྒྱལ་དབང་བཅུ་གསུམ་པ་ཆེན་པོའི་སྐུ་ཚེ་གཅིག་པུའི་ཐོག་ནས་ཀྱང་ར་སྤྲོད་བྱེད་ཐུབ” ཅེས་པའི་རྩོམ་ཡིག་ལ་རྩེ་ཕུད་ཨང་དང་པོའི་བྱ་དགའ་ཐོབ་ནས་ཧིན་སྒོར་ཉིས་ཁྲི་ལྔ་སྟོང་དང་ཕྱག་ཁྱེར་ཕུལ།

བསྟན་འཛིན་ཀླུ་སྒྲུབ་ཀྱིས་བྲིས་པའི་“བོད་རང་བཙན་སྐབས་ཀྱི་ལོ་རྒྱུས་ལ་དཔྱད་ཞིབ་དང་འབྲེལ་ལོ་རྒྱུས་ཐོག་ནས་བོད་རང་བཙན་ཡིན་པའི་ཁུངས་སྐྱེལ་”ཞེས་པར་ཨང་གཉིས་པའི་བྱ་དགའ་ཧིན་སྒོར་ཆིག་ཁྲི་ལྔ་སྟོང་དང་ཕྱག་ཁྱེར་ཕུལ། སྐལ་བཟང་དོན་གྲུབ་ཀྱིས་བྲིས་པའི་“རང་བཙན་གྱི་འཐབ་རྩོད་མུ་མཐུད་གནས་དགོས་”ཞེས་པར་ཨང་གསུམ་པའི་བྱ་དགའ་ཧིན་སྒོར་ཆིག་ཁྲི་དང་ཕྱག་ཁྱེར་ཕུལ།

དེ་བཞིན་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་ལྔ་པའི་གོ་སྒྲིག་ཚོགས་ཆུང་ནས་དཔྱད་རྩོམ་བསྡུ་རུབ་ཀྱིས་ <<རང་བཙན་>> ཞེས་པའི་དེབ་ཅིག་ཀྱང་པར་སྐྲུན་བྱས་ཏེ། ༢༠༡༨ ལོའི་ཕྱི་ཟླ་༥ ཚེས་༢༣ ཉིན་ཚོགས་ཆེན་མཛད་སྒོའི་ཐོག་དབུ་འབྱེད་འགྲེམས་སྤེལ་བྱས་ཡོད་པ་རེད།།