རྒྱལ་སྤྱིའི་བོད་རང་བཙན་གྱི་ཚོགས་ཆེན་ཞིག་ནིའུ་ཡོག་ཏུ་འཚོགས་པ།
༢༠༡༦ ལོའི་ཕྱི་༧ ཚེས་༡ ཉིན་ནས་ཉིན་གསུམ་རིང་ནིའུ་ཡོག་ཏུ་བོད་མི་རང་བཙན་དོན་གཉེར་བ་ཁག་ཅིག་གི་གོ་སྒྲིག་འོག རྒྱལ་སྤྱིའི་བོད་རང་བཙན་གྱི་ཚོགས་ཆེན་ཞིག་འཚོག་གི་ཡོད་པ་དང་། དེར་ཨ་རི་གཙོ་བྱས་པའི་རྒྱལ་ཁབ་འདྲ་མིན་ནས་ཚོགས་ཞུགས་པ་སླེབས་ཡོད་པ་རེད།
རང་བཙན་ཚོགས་འདུ་དེ་སྲིད་བློན་ཀླུ་ཁང་པ་ཚེ་དབང་རབ་བརྟན་སྐུ་གྲོངས་ནས་ལོ་༥༠ འཁོར་བའི་དུས་ཚོད་དང་སྟབས་བསྟུན། བོད་རང་བཙན་ཆེད་བློས་གཏོང་བྱེད་མཁན་ཤི་གསོན་ཡོངས་ལ་བཀའ་དྲིན་རྗེས་དྲན་དང་། རང་བཙན་འཐབ་རྩོད་ལ་འཕྲད་བཞིན་པའི་དཀའ་ངལ་ཁག་ལ་གདོང་ལེན་བྱེད་ཕྱོགས། རང་བཙན་འཐབ་རྩོད་རྒྱུན་གནས་ཡོང་ཆེད། མ་འོངས་འཐབ་རྩོད་ཀྱི་མདུན་བསྐྱོད་དང་ཐབས་ཇུས་སྐོར་ལ་བགྲོ་གླེང་གནང་རྒྱུ་ཡིན་པ་རེད།
ཉིན་དང་པོར་ཚོགས་འདུ་དབུ་འབྱེད་ཀྱི་མཛད་སྒོ་འཚོགས་པ་དང་། གོ་སྒྲིག་པ་བསྟན་འཛིན་དབང་འདུས་ཀྱིས་འགྲེལ་བརྗོད་གནང་བ་ལྟར་ན། བོད་རང་བཙན་འཐབ་རྩོད་པ་རྒན་གྲས་ལྷ་བཟང་ཚེ་རིང་ཚོགས་འདུ་དེའི་ཐོག་སྐུ་མགྲོན་གཙོ་བོར་གདན་ཞུ་དང་ཁོང་ལ་ཐུགས་རྗེ་ཆེ་ཞུའི་གཟེངས་རྟགས་ཤིག་འབུལ་འཆར་ཡོད་ནའང་། ཁོང་ཨ་རིར་ཕེབས་རྒྱུའི་ཡིག་ཆའི་དུས་ཚེས་སྔོན་ནས་རྫོགས་ཡོད་པས། བསྐྱར་གསོ་བྱེད་མ་ཐུབ་པར་ཕེབས་ཐུབ་མེད་པ་རེད། དེ་བཞིན་རང་བཙན་འཐབ་རྩོད་རྒན་གྲས་མཁས་དབང་འཇམ་དབྱངས་ནོར་བུ་དང་། ཨ་བོད་མཛའ་འབྲེལ་ཚོགས་པའི་ཚོགས་གཙོ་བསོད་ནམས་དབང་འདུས། གཞོན་ལྷན་ཚོགས་མི་རྒན་གྲས་ཟླ་བ་རྒྱལ་པོ་བཅས་ལ་ཐུགས་རྗེ་ཆེ་ཞུའི་གཟེངས་རྟགས་ཕུལ་ཡོད་པ་རེད།
ཚོགས་ཆེན་དེའི་ཐོག་རྒྱ་གར་ནས་བོད་མི་མང་སྤྱི་འཐུས་བསྟན་པ་ཡར་འཕེལ་དང་། ཨ་ཚོགས་ཀླུ་མཁར་བྱམས་གཉིས་ཕེབས་ཡོད་པ་དང་། དེ་བཞིན་ཨོ་སི་ཁྲི་ལི་ཡ་དང་། ཡུ་རོབ། ཁེ་ཎ་ཊ་སོགས་ནས་ཚོགས་ཞུགས་པ་སླེབས་ཡོད་པ་རེད། རྒྱ་གར་དྷ་རམ་ས་ལར་གནས་གནས་སྡོད་རང་བཙན་དོན་གཉེར་བ་ཁག་ཅིག་མཉམ་འཛོམས་ཀྱིས་ཚོགས་འདུ་དེ་ལ་རྒྱབ་སྐྱོར་མཚོན་ཆེད་དུ་བསམ་ཚུལ་ཁག་ཅིག་ཡིག་ཐོག་ནས་ཕུལ་ཡོད་པ་རེད།
བོད་རང་བཙན་འཐབ་རྩོད་པ་རྒན་གྲས་དང་རྩོམ་པ་པོ་ལྷ་བཟང་ཚེ་རིང་གིས་བརྙན་འཕྲིན་བརྒྱུད་དགོངས་ཚུལ་ཞིག་གསུངས་པའི་ནང་། “ཨ་རིའི་གྲོང་ཁྱེར་ནིའུ་ཡོག་ཏུ་རང་བཙན་ཚོགས་ཆེན་ཞིག་འཚོག་གི་ཡོད་པ་དེའི་ཐོག་ང་དངོས་སུ་བཅར་མ་ཐུབ་ཀྱང་། ངའི་སེམས་དེ་ལ་ཡོད། ཁྱེད་ཚོས་ང་ཚོ་མི་རེ་གཉིས་ཀྱི་བསམ་ཚུལ་ཙམ་མ་ཡིན་པར། གཞིས་ལུས་མི་མང་ས་ཡ་དྲུག་གི་རེ་བ་དང་འདོད་པ་ལ་བརྩི་བཀུར་བྱས་པ་དང་བདག་པོ་བརྒྱབ་པར་ཐུགས་རྗེ་ཆེ་”ཞེས་གསུངས་ཡོད་པ་རེད།
༢༠༡༥ ལོའི་ཕྱི་ཟླ་༥ ཚེས་༢༣ ཉིན་སྟེ་རྒྱ་ནག་གི་བཙན་འཛུལ་འོག་བོད་རྒྱའི་བར་གྲོས་མཐུན་དོན་ཚན་བཅུ་བདུན་བཞག་ནས་ལོ་༦༤ བའི་ཉིན་མོ་དང་སྟབས་བསྟུན། ཉིན་གཉིས་རིང་བོད་མི་སྒེར་པ་ཁག་ཅིག་གི་གོ་སྒྲིག་འོག རྒྱ་གར་གྱི་རྒྱལ་ས་ལྡི་ལི་རུ་རྒྱལ་སྤྱིའི་བོད་རང་བཙན་གྱི་ཚོགས་ཆེན་དང་པོ་དེ་འཚོགས་ཡོད་པ་རེད། །
གསར་འགོད་པ་ཆོས་ཉིད་འོད་ཟེར།